ميكس فريد من نوعه في ريد بل مزيكا صالونات!
حلقة جديد من ريد بل مزيكا صالونات المرادي بمشاركة دنيا وائل مع أبو سهر!
كعادة ريد بل مزيكا صالونات وميكساتهم المفاجأة، إلا إن المرادي بيجمعوا اتنين فنانين مفاجئين بشكل كبير!
دنيا وائل ورغم إن أشهر أغانيها اللي بيحبها جمهورها عبارة عن تعاونتاها المشهورة مع الوايلي، واللي بتاخد إتجاه الأغاني الإلكترو-شعبي في مزيكتها، ف هي مش جديدة على النوع ده من الموسيقى. إلا إن لون المزيكا الشعبي اللي بيقدمه أبو سهر يخلي المرادي تعاونها معاه تجربة فريدة من نوعها.
وده لأكتر من سبب، أولهم إن لون المزيكا اللي بيقدمها أبو سهر وبيتميز بيها عن غيره أقرب لمزيكا المولد والأغاني الشعبي، وده لون لسه مشفناش دنيا وائل بتقدمه لحد دلوقتي. وعلى الناحية التانية هنلاقي إن أبو سهر في أغلب تراكاته بيكتفي بإنتاج المزيكا من غير أصوات أو فوكالز تتغنى عليها، وفي أوقات بيزود كلمات بسيطة من كتابته، لكن تجربة إنتاج أغنية كاملة بالإشتراك مع فنان تاني لسه مسمعناهاش منه.
هل التجربة هتنجح؟
دنيا وائل من أحسن الأصوات اللي ظهروا مؤخرا في الجيل بتاعها، والمعروف عنها حبها للتجارب الجديدة في أغانيها. نفس الوضع هنلاقيه مع أبو سهر اللي انتشر بين الجمهور في السنة الأخيرة بشكل كبير، وكانت شهرته الأولى هي لايفات انستجرام اللي كان بيطلع يجرب أصوات جديدة فيها.
فالتجربة هتكون جديدة على الاتنين لكنهم بيحبوا التجارب، وصعب توقع الأغنية اللي هينتجوها هتكون عاملة ازاي أو هتنجح ولا لا، بس كل ده هنعرفه يوم التلات الجاي زي كل مرة لما الأغنية الرسمية تنزل.
