بعد إنتهاء الماراثون الرمضاني السنة دي، وداعنا الشخصيات والمسلسلات اللي حبيناها وتابعناها طول شهر رمضان. بس السباق الدرامي مش هيخلص عند كده، لأن فيه مجموعة جديدة من الأعمال المنتظرة هتبدأ في الأسابيع الجاية.
“البيت بيتي ٢”
كراكيري وبينو رجعوا تاني بالهزار اللي ناس كتير استمتعت بيه في الموسم الأول. بطولة كريم محمود عبد العزيز، مصطفى خاطر، ميرنا جميل. العرض ده قدر يجمع بين الضحك مع الدراما الخفيفة، واحنا مستنيين نشوف هيحصل إيه في الموسم الجديد.
“البحث عن علا ٢”
إيه اللي ممكن يحصل لعلا في رحلتها لاكتشاف نفسها وشخصيتها الحقيقية؟ لازم نستنى ونشوف. بس الموسم ده فيه مفاجآت كتيرة، منها إنضمام ظافر العابدين للمسلسل جنب هند صبري، سوسن بدر، ياسمين العبد. وكمان رجوع حازم أخو علا، اللي كان بيلعب دوره طارق الإبياري في “عايزة أتجوز”، وده زود توقعاتنا للموسم الجديد.
“دواعي السفر”
بعد ما أمير عيد خطف أنظارنا بموسمين من “ريفو” راجع تاني مع فريق عمل مميز وجاهزين يسلونا بإصدارهم الجديد. المسلسل بطولة أمير عيد، كمال الباشا، أحمد غزي، نادين، أيمن الشيوي، العرض هياخدنا في رحلة علي وإبراهيم، الجيران اللي حياتهم هتتداخل بطرق ما كانتش متوقعة.
“موعد مع الماضي”
فريق العمل خلي المسلسل ده واحد من أكتر الأعمال المنتظرة. أبطال المسلسل أسر ياسين، صبا مبارك، شريف سلامة، محمود حميدة، التريلر الدرامي ده وعد إنه هيشدنا بشخصياته اللي هتخوض رحلة لكشف الحقيقة، والظروف ممكن تتصاعد لدرجة الانتقام وتفلت الأمور من السيطرة.
“انترفيو”
بتدور الأحداث حول نادين محللة بيانات، وبتروح ﻹجراء مقابلة عمل ولكنها لم تكن تعلم أن المقابلة دي هتقلب حياتها رأسًا على عقب، وبتتوالى الأحداث وبيشارك في المسلسل رنا رئيس، خالد شباط، ديانا هشام، مونيكا ألفونس، سارة نور، محمد عادل.
