كندريك لامار بيدّي درس في ازاي تعمل حفلة Artist Experience ناجحة وتلفت أنظار الفنانين مش الجمهور بس!
مفيش شك إن The Big Steppers Tour اللي كندريك بيقدمها لألبومه الجديد بصمة كبيرة في تاريخ حفلات الراب خصوصََا والحفلات فالعموم! واللي نتمنى نشوف تجارب قريبة منها في مصر والوطن العربي. وده نابع من كونه من بداية ظهوره بيقدم فن بيعبر عنه وعن مجتمعه والمعاناة والتجارب اللي بيمروا بيها، واللي بيقدمله مادة دسمة جدََّا يقدر من خلالها يوصل أفكاره بأكتر من شكل متنوع في حفلاته عشان يحكي قصص تقدر تلمسها من من مجرد سماعها وكمان يزود عليها عناصر بصرية توصلك الإحساس بشكل أكبر وأشمل.
في الأرتكل ده هنحكيلك “شوية” من أسباب ليه الـ tour دي هي أحسن مثال لحفلة Artist Experience ممكن تتعمل:
-
فقرات الحفلة:
ده لإن كندريك مقسم الأداء لفقرات بترتيب القصة اللي عايز يوصلها للجمهور، مش بمجرد الترتيب الزمني للأغاني. والقصة اللي بيظهرها هي الصراع النفسي اللي بيمر بيه في الألبوم الجديد اللي كان بيجهزه في السنين الأخيرة، واللي مرت فيه فترة الحجر العالمي بسبب وباء كورونا. وكمان بيحكي قصة عن شخصيته الحالية وازاي وصلها بعد تطورات كتيرة، وعن إن عالم صناعة الموسيقى بيحبسوه في شخصية معينة اللي حابينه يظهر بيها للناس بعيد عن شخصيته اللي عايز يظهرها.
2. سرد للقصة:
ولإن التجربة ممكن تكون أشمل من إنها تتعبر هنا بكلمات أغاني بس، كندريك استخدم في العرض Voice over تكون وظيفته توجيه القصة وتوضيح الفترة للجمهور. والكلام كان بيمثل صوت أفكار كندريك وصوت الشخصية اللي بترشده وبيعتبرها المنقذ بتاعه، عشان تنبهه لحالته النفسية وتحاول تحافظ عليه من الغرور وإن نجمه يطغى على حقيقته ويشوهها.
3. المؤثرات البصرية:
الحفلة فيها مؤثرات بصرية مش كلها موجودة لمجرد الشكل، لكن كمان بتخدم القصة والحالة اللي عايز يوصلها من كل أغنية، ومنها اللي بتكون متفاعلة مع رقصاته وحركته على المسرح، عشان نشوف كندريك بهيئته على المسرح لكن نشوف عناصر إضافيته موجودة مع هيئته في المؤثرات توصلنا اللي حاسس بيه.
4. الرمزية:
من أول ظهور لكندريك لامار وهو بيوظف الرمزية في أغلب أعماله، من كلمات أغانيه للكليبات للحفلات، وبقا معتاد لجمهوره إنهم يدوروا على المعنى الباطن لكل حاجة بيقولها أو بيعملها، واللي فالأغلب بتكون ليها قصة خاصة بيها يدافع بيها عن قضية معينة في مرة، ويعلن تضامنه مع أشخاص في مرة، ويشرح إحساسه بيها في مرة تانية.
و في الحفلة دي بيستخدم الرمزية في أكتر من فرصة أبرزهم الدمية المماثلة ليه اللي بيبدأ العرض وهو ماسكها وبتتحرك معاه كإنهم بيغنوا سوا، عشان يعبر عن الفترة اللي كان بيخبي فيها مشاعره وبيحاول يظهر جانب من شخصيته بدون تعبيرات أو مشاعر. وكمان مكعب العزل اللي بيظهر خلال العرض وبيتحبس جواه مع أفراد بسترات وقائية من الأمراض، واللي بيمثل حالته مع صناع الموسيقى اللي عايزين يحبسوه في شحصية تجارية يظهر بيها للجمهور بعيد عن الأفكار اللي بيحاول يقدمها لكونها سامة بالنسبالهم، وبعيد عن شخصيته الحقيقية. وبيخرج كندريك من شخصية المكعب مع بداية أغنيته المشهورة “Alright” اللي بتحمل دعوة للتفاؤل، وبعدها بيترفع المكعب وكندريك جواه وهو بيغني “Mirror” اللي بيختار نفسه فيها، وده اللي بيحصل فعلا وهو بيطلع لفوق بعيد عن الجمهور.
5. عدد الأغاني:
عشان تقدر توصل تجربتك بشكل كافي هتحتاج أغاني من كل الفترات، وبعدد يوصل القصة وكمان يرضي الحمهور، وده اللي كندريك بالرغم من كون الجولة خاصة بألبومه الجديد لكنه بيغني 28 أغنية من أحسن أغانيه ومن اكتر من ألبوم، وكلهم بشكل يتماشى مع القصة اللي بيوصلها!
6. ضيف الحفلة:
أصبح من المتعارف عليه من أغلب فنانين العالم ومنظمين الحفلات وجود فنان آخر ضيف في الحفلة. سواء بالتواجد لوحده في أداء قبل الأداء الرئيسي للحفلة أو وجوده في أغاني مشتركة مع الفنان الرئيسي، أو الاتنين سوا.
ومفيش ضيف ممكن يكون أنسب للوجود من كندريك من شريكه و ابن عمه Baby Keem واللي ظهر مؤخرا بمستوى حققله شهرة كبيرة في وقت قصير، وخصوصََا بعد نجاح أغنيتهم سوا “Family Ties” واللي كانت عودة مفاجأة لكندريك بعد غياب سنين، ونزلت قبل الألبوم وحققت نجاح ساحق عشان تكون الأغنية اللي كل الجمهور بيستناها في حفلاته.
7. الموسيقى:
مش جديد على كندريك وجود آلات موسيقية كتير ومختلفة في مجموعة من أغانيه، ومعروف عنه إنه في مناسبات كتير بيغير توزيعات أغانيه عشان تشارك فيها أوركسترا أو باندات روك أو عازفين من أي نوع موسيقي، وده بيعمله في حفلات كتير سواء حفلاته الشخصية، أو مهرجانات كبيرة زي الـ GRAMMYs أو SuperBowl Half-Time Show وغيرهم كتير جدا، ومننساش إنه في بداية شهرته غنى أغنيته المشهورة “M.a.a.d City” مع باند “Imagine Dragons” واللي كان ميكس مفاجئ مع أغنيتهم “Radioactive” في حفلة الجرامي.
المرادي كمان كندريك بيزود إن هو بنفسه بيعزف بيانو في بعض أغانيه في الحفلة، وبينهي العزف بالانترو المشهورة لأغنية “Humble” عشان يكمل الحفلة بالغناء من غير عزف، لكن بعناصر تانية مختلفة يكمل إبهارنا بيها.
8. تصميم الرقصات والأزياء:
الاستعراضات في حفلاته بتكون من أقوى العناصر الموجودة، واللي بيشارك فيها دايمََا ويوظّفها في خدمة القصة اللي بيقدمها.
وكمان اختياراته هو وفريق العمل الخاص بيه للطلّات والألوان اللي بيستخدموها مش بتكون بالصدفة أو للشكل، ولكن بيكون في فكرة وهدف من وراها عشان برده يوصل القصة بيه.
