أنتهي السباق الرمضاني ٢٠٢٤ وأنتهت أعمال كتير حبيناها، بس في أعمال هتكمل معانا السنة الجاية أعلن فريق عمل المسلسلات دى أنه هيكون في منها جزء جديد يتعرض فى موسم رمضان ٢٠٢٥ منها:
العتاولة
اللى بيتكلم عن أخين “أحمد السقا و طارق لطفى” ورثوا الجريمة من والدهم وفى بينهم صراع بسبب الحقد والغيرة واللى بيسبب تدمير الاسرة و دخول واحد منهم السجن.
كامل العدد +١
المسلسل بيتكلم عن المشاكل اللى بيواجهها أحمد و ليلى “شريف سلامة و دينا الشربينى” فى تربية أبنائهم الـ ٨ بعد ما اتجوزوا فى الجزء الاول، المسلسل بيناقش المشاكل اللى بيواجهوها فى علاقتهم ببعض والمشاكل اللى بتقابل الأولاد اللى فى مراحل عمرية مختلفة.
المداح
المسلسل بيحكى عن المشاكل اللى بيواجها صابر المداح مع الجن و فى الجزء الرابع بيروح لأسوان علشان يحل مشكلة أحد العائلات مع الجن لكنه بيكتشف أنه اتعرض للخداع
وبيقرر يرجع لكن بيتعطل بسبب أنه بيقابل مشاكل و بيكتشف مفاجأت.
جودر
المسلسل بيتكلم عن قصة ألف ليلة وليلة وبيحكى قصة جودر ابن عمر المصرى واللى حصله ليه ولأخواته بعد وفاة والده. وأنه كان بيدخل فى مغامرات فى عالم سحرى واللى بتحوله من صياد بسيط لأغنى اغنياء الدولة.
أشغال شقة
مسلسل كوميدى بيحكى عن طبيب شرعي اسمه حمدي عبد الرحيم اللي بيجسد شخصيته “هشام ماجد”، واللي بيُرزق بتوأمين وبيبدأ هو ومراته “أسماء جلال” البحث عن مديرة منزل لرعاية الطفلين، لكن الموضوع بيكون صعب وبتبدأ معاناتهم مع انشغالهما بالعمل ومحاولاتهم انهم يلبوا احتياجات اطفالهم.
الكبير أوى
مسلسل الكبير اوى اتعرض منه ٨ أجزاء فى مواسم رمضان المختلفة وهو بيحكى عن “الكبير” عمدة المزاريطة واللى بيحاول يهتم بقضايا ومشاكل أهل القرية وكمان بيتكلم عن مغامراته مع اخواته “حزلقوم” و “جونى” ومراته “مربوحة”.
