الأفلام دايما بتحكى قصص من الواقع لكن فى أفلام بتوثق قصص حقيقية مرت فى حياتنا جمعنالك ٥ أفلام رفعت شعار حدث بالفعل.
“النمر الاسود” ١٩٨٤
رحلة الشاب المصري “محمد حسن” اللي بيسافر لألمانيا لفرصة عمل لكن بيواجهه شوية عقبات لحد ما بيقابل مدرب الملاكمة العجوز “كوستا” اللي بيقرر يخليه بطل رياضي.
الفيلم مأخوذ عن قصة حقيقية للملاكم المصري المحترف بألمانيا “محمد حسن المصري” وشارك في عدد كبير من البطولات الرسمية وفاز بالعديد منها.
الفيلم بطولة أحمد زكى وأحمد مظهر ووفاء سالم وإخراج عاطف سالم.
“معالى الوزير” ٢٠٠٣
الفيلم بيحكى عن “رأفت رستم” اللي بيتم اختياره لمنصب وزاري عن طريق الخطأ بسبب تشابه اسمه مع شخص آخر. لكن حياته بتتقلب و بيشوف كوابيس فبيضطر للبوح بأسراره إلى مدير مكتبه.
الفيلم يسرد واقعة حقيقية جرت في عهد حسني مبارك وأن بطل الواقعة قد عُرف في الأوساط السياسية بلقب “وزير الصدفة”.
الفيلم بطولة أحمد زكى ويسرا ومن إخراج سمير سيف.
“تيتو” ٢٠٠٤
بيحكى عن طفل نشأ فى إصلاحية بسبب ارتكابه لجريمة قتل وبعد خروجه بيشارك فى عصابة بتنفذ عمليات سرقة و لما بيقرر يبدأ حياة جديدة بيكتشف ان الموضوع مش سهل.
فكرة الفيلم مستوحاة من الواقع من خلال لقاء إجراه الإعلامي مفيد فوزي مع نزلاء الإصلاحيات ببرنامجه الشهير “حديث المدينة”.
بطولة أحمد السقا و خالد صالح و حنان ترك ومن إخراج طارق العريان.
“الجزيرة” ٢٠٠٧
الفيلم بيحكى عن رحلتي صعود وسقوط “منصور الحفنى” بتولى خلافة عائلته وإمبراطوريته الإجرامية لتجارة السلاح والمخدرات بسبب نشاطه ده بيواجه صراعات مع اطراف مختلفه.
أحداث الفيلم مستوحاة من قصة “عزت حنفي” اللي فرض سيطرته على جزيرة النخيلة التابعة لمحافظة أسيوط وعُرف إعلامياً باسم “إمبراطور النخيلة” وتم القبض عليه في ٢٠٠٤ وتم إعدامه هو وشقيقه في ٢٠٠٦.
الفيلم بطولة أحمد السقا وهند صبرى ومحمود ياسين ومن إخراج شريف عرفة.
“أسماء” ٢٠١١
الفيلم بيتكلم عن السيدة الريفية “أسماء” اللى بتصاب بمرض الإيدز وبتحاول تخفى الموضوع عن الكل، ووبتحتاج جراحة وبيرفض الجراحين يعالجوها خوف من العدوى لحد ما بتقرر تطلع فى التلفزيون تشارك مشكلتها مع المجتمع.
الفيلم مستوحى من قصة حقيقية لسيدة تعاني من مرض الإيدز، كما ظهر ضمن أحداثه عدد من مرضى الإيدز الحقيقيين في محاولة لمواجهة المجتمع وتغيير نظرته إليهم.
الفيلم بطولة هند صبرى و إخراج عمرو سلامة.
