قبل كأس العالم 2022 في قطر، ومع إتجاه كل العيون ليه، بنفتكر معاكم أحسن أغاني اتعملت لكأس العالم في السنين الأخيرة.
كأس العالم دايمََا بيسيب معانا ذكريات نفتكرها باقي حياتنا. مش بس بالماتشات ومتعة كرة القدم، لكن كمان بأغانيه اللي بتضيف روح كبيرة للبطولة وبنفضل نسمعها لسنين بعدها.
وفي الأرتكل ده هنشارككم تفضيلاتنا لأكتر أغاني لكأس العالم اتعلقنا بيها.
1. Waka Waka – Shakira, Freshlyground
ملكة كأس العالم المتوجة من الجمهور!
جمهور الكرة في العالم مجتمع على إن شاكيرا هي ملكة كأس العالم بدون منازع، واللي أغانيها لكل بطولة دايمََا بتغلب باقي الأغاني عند الجمهور وبيستنوها كل مرة.
في كأس العالم 2010، وفي أول بطولة كأس عالم تتعمل في دولة أفريقية، شاكيرا نزلت أنجح أغنية رسمية في تاريخ كأس العالم “Waka Waka – This Time For Africa”، وشاركها فيها باند الأفرو-فيوجن الجنوب أفريقي Freshlyground اللي ساعدوا في دخول طابع الموسيقى الأفريقي وحضارتها في الأغنية اللي انبهر العالم كله بيه. واتعمل منها نسختين إنجليزي وأسباني غنيتهم المغنية الكولومبية.
الكليب شارك فيه نجوم كتير من كل المنتخبات المشاركة، وحقق 3.2 مليار مشاهدة على يوتيوب، ولغاية النهاردة وبعد 12 سنة من نزولها في مليون مشاهدة جديدة كل يوم!
وحتى لو لغاية دلوقتي مش فاهمين كلمات الكورس، لكن لو الأغنية اشتغلت لازم هتغنيها كاملة معاها.
2. Wavin’ Flag – K’naan
كوكاكولا وأغاني كأس العالم اللي من إنتاجها!
كوكاكولا في كل بطولة بتنتج أغنية غير رسمية، لكن نجاحها وانتظار الجمهور ليها مبيقلش عن الأغنية الرسمية. في نفس النسخة من كأس العالم في 2010، نزل الفنان الصومالي-الكندي K’naan أغنية “Wavin’ Flag” اللي بوجودها مع “Waka Waka” اعتمد الجمهور النسخة دي من البطولة كأفضل أغاني عدت على تاريخها.
كلمات الأغنية كانت من أكبر أسباب نجاحها، واللي قدرت توصلك إحساس بالحماس والحرية والأمل كل ما تسمعها من جديد. وكمان مع مزيكتها القوية بقت صعب إنك تسمعها ومتتعلقش بيها. وده خلاها توصل لـ 400 مليون مشاهدة رغم كونها مش أغنية رسمية للبطولة!
الأغنية كمان اتعمل منها نسخة تانية عربية برعاية كوكاكولا وبالتعاون من نانسي عجرم عشان توصلها أكتر للجمهور العربي، وكانت بعنوان “شجع بعلمك”.
3. La Copa De La Vida – Ricky Martin
Here We Go, Ale Ale Ale!
حتى لو كنت من جيل ملحقش كأس العالم 1998 في فرنسا، ف أكيد لو سمعت الكلمات دي هتعرف الأغنية!
“La Copa De La Vida” أو “The Cup of Life” اللي اتعمل منها نسختين بالإنجليزي والأسباني، واللي عرضها في حفلة الـGRAMMYs سنة 1999 كان من أسباب بداية إنفجار الأغاني اللاتيني وكسب ريكي مارتن بسببها الجرامي لأحسن أداء لايف لأغنية لاتين بوب رغم نزولها قبل المسابقة بسنة، كانت الأغنية الرسمية لكأس العالم 1998.
من قوة صوت ريكي مارتن، لحضوره ورقصاته على المسرح، لموسيقى الأغنية ولحنها المميز جدا، مجلات ونقاد كتير بيعتبروا الأغنية دي أحسن أغنية نزلت في تاريخ كأس العالم.
4. La La La – Shakira, Carlinhos Brown
شاكيرا وكأس العالم من جديد!
مرة تانية بترجع شاكيرا لكأس العالم في البرازيل في 2014 بعد نجاح أغنيتها في 2010. ورغم كونها أغنية مش رسمية للبطولة حسب الإعلان عنها، لكنها حققت نجاح أكبر من الأغنية الرسمية، واللي خلاها تغنيها لايف في حفل ختام البطولة.
كليب الأغنية كالعادة ظهر فيه نجوم كتير لكرة القدم أبرزهم ليونيل ميسي، نيمار، جيمس رودريغيز اللي كان من نجوم البطولة، وزوجها في وقت الكليب جيرارد بيكيه مع ابنهم ميلان. والكليب بقا تاني كليب في تاريخ كأس العالم يعدي المليار مشاهدة على يوتيوب مع “Waka Waka”!
والأغنية كانت ميكس بين مزيكا البوب والفانك البرازيلي، مع صوت الإيقاع القوي الحماسي، وده خلاها الأقرب لقلوب الجمهور في البلد المستضيفة في الإحتفالات والتجمعات، وبترجع تاني شاكيرا بأسلوبها وصوتها المميز تثبت إنها ملكة البطولة والمفضلة للجماهير.
5. We Are The Champions – Queen
باند الروك البريطاني Queen وكأس العالم!
في سنة 1994 استضافت الولايات المتحدة الأمريكية النسخة الـ 15 من كأس العالم، وكانت أغنية “We Are The Champions” لـ Queen ضمن أغاني البطولة. وبالرغم من كونها مش مكتوبة مخصوص ليها، لكنها كانت مناسبة جدََّا وحاليََا بيتم استخدامها في مناسبات تنافسية كتير عالمية وفي أفلام وإعلانات كتير.
والنسخة دي من كأس العالم تحديدََا كانت مثيرة للجدل ومليانة أحداث مميزة، انتهت بتتويج البرازيل بالبطولة واللي كانت المنتخب الوحيد وقتها اللي كسب 4 نسخ منها، عشان تكون الأغنية معبرة فعلا عن البطل.
6. We Are One – Pitbull, Jennifer Lopez, Claudia Liette
نرجع لكأس العالم 2014 في البرازيل من جديد، لكن المرادي بالأغنية الرسمية للبطولة!
إنجليزي، أسباني، برتغالي، 3 لغات اتجمعوا سوا في أغنية واحدة. من الرقصات للملابس للعب الكورة على الشواطئ، كليب الاغنية عكس الثقافة البرازيلية بشكل ممتاز ووصلها للجمهور من أنحاء العالم.
الاغنية اتغنت في افتتاح البطولة، والطاقة الموجودة واللي مشهور بيها الـ 3 نجوم في الأغنية كانت من أكبر الأسباب لنجاحها.
7. Colors – Jason Derulo
كوكاكولا وأغانيها لكأس العالم من جديد!
في النسخة الأخيرة من كأس العالم 2018 في روسيا، كوكاكولا أنتجت أغنية “Colors” لـ Jason Derulo واللي كانت الأغنية الأنجح في النسخة دي من البطولة رغم كونها مش الأغنية الرسمية مرة كمان.
كليب الأغنية كانت شامل لكل أعلام الدول المشاركة في البطولة، مع رقصات وأزياء مميزة تعبر عن الفن المنتشر في كل بلد منهم، وده كان سبب كبير يوصلها للجمهور من مختلف الدول.
النسخة اللي اتقدمت من كوكاكولا للبطولة كانت بالإنجليزي لـ Jason Derulo لوحده، لكن النسخة الأصلية منها كانت باللغتين الإنجليزية والأسبانية بمشاركة الفنان الكولومبي Maluma، واللي بيقدم السنادي أغنية لكأس العالم 2022 في قطر مع النجمتين ميريام فارس و نيكي ميناج وهتصدر خلال الأيام القليلة الباقية قبل البطولة.
وكعادة كوكاكولا، اتعمل نسخة تانية من الأغنية للجمهور العربي، شارك فيها النجم المصري تامر حسني، وكان كلمات الأغنية متوجهة للمنتخب المصري لمشاركته في النسخة دي من البطولة.
8. Hips Don’t Lie “Bamboo” – Shakira, Wyclef Jean
بنختم بأغنية كمان لشاكيرا كانت بداية رحلتها مع أغاني كأس العالم!
سنة 2006 في الملعب الأولمبي في برلين، لعبت شاكيرا أغنيتها الشهيرة “Hips Don’t Lie” اللي كانت من أبرز نجاحاتها في أوائل ظهورها، مع الرابر الهاييتي Wyclef Jean. و أضافوا ريمكس بسيط على الأغنية من ناحية الموسيقى والكلمات عشان تكون لايقة أكتر مع الحدث الكبير.
حفلة الختام من وسط المدرجات كتير من الجمهور بيعتبرها من أقوى حفلات ختام البطولة، وظهورها في البطولة ساعد كتير في نجاح الأغنية اللي لازال ليها مستمعين كتير لحد دلوقتي، وكان السبب الأكبر في بداية رحلة شاكيرا مع أغاني كأس العالم، واللي لسه مأعلنتش عن وجود أغنية للنسخة الحالية من البطولة، لكن كل الجمهور بيتمنى مشاركتها من جديد.
