من كولومبيا للقاهرة!
المغنية الكولومبية Karol G نزلت كليب جديد بعنوان “Cairo” على يوتيوب، واللي لفت إنتباه كتير من جمهور المزيكا المصري اللي ميعرفهاش.
الكليب متصور في منطقة الأهرامات ومناطق من القاهرة وكوبري قصر النيل، لكن الأغنية متذكرش فيها اسم القاهرة أو مصر إنما التسمية جت من مكان تصوير الكليب بس، واللي كان هدفها الإنتشار أكتر في المنطقة والشرق الأوسط.
والكليب دلوقتي تريند رقم 2 على يوتيوب ميوزك، ووصل لـ 10 مليون مشاهدة في 3 أيام بس!
“كارول جي” من أشهر المغنيين في دول أمريكا اللاتينية، واللي بتتميز هي والمغنيين اللاتينيين بمزيكا الـ Reggaeton. وفي الفترة الأخيرة ابتدت بعض الأغاني المصرية تاخد طبع النوع ده من المزيكا، زي أغنية “برازيل” لمروان موسى وعفروتو اللي كان باين فيها الإيقاعات البرازيلية اللي بدورها مستوحاة من مزيكا الريجاتون الأصلية. والنوع ده من المزيكا دايمََا بيكون في طاقة في أغانيه بسبب أصواته إيقاعاته، اللي بيخليه سائد على باقي الأنواع في الدول اللاتينية لحبهم للرقص ورقصاتهم المميزة.
والأغنية من إنتاج Ovy اللي من أشهر منتجين مزيكا الريجاتون والمشهور بجملة “Ovy On The Drums” اللي بنسمعها في أغاني كتير مشهورة، وحصل بينه وبين Karol G تعاونات كتير قبل كده.
