إمينيم في راب باتل مع سبايدر مان!
في إصدار مميز ومحدود جدََّا، أعلنت مارفل بالإشتراك مع أيقونة الهيب الهوب إمينيم عن نسخة جديدة من كوميكس سبايدر مان بيظهر فيها إمينيم على البوستر الرسمي للمجلة. والبوستر بيظهر فيه إمينيم في “راب باتل” مع سبايدر مان، في مشهد شبيه بالمشهد المعروف من راب باتل إمينيم في فيلمه “8Mile”.
والإصدار ده من المجلة بمناسبة الإحتفال بإصدار سلسلة جديدة من كوميكس سبايدر مان اللي بتمثل عالم موازي تحت عنوان “The Amazing Spider-Man #1″، و اللي نزلت في شهر إبريل الماضي.
ومن المفترض إن الإصدار هينزل يوم 27 من شهر نوفمبر الجاري، بعدد محدود 1000 نسخة بس.
20 سنة على 8 Miles!
على الجانب التاني، إيمينيم بيشارك في الإصدار بشخصية “B-Rabbit” من فيلمه اللي حصل بيه على الأوسكار “8Mile”، بمناسبة مرور 20 سنة على إصدار الفيلم.
كما إنه أعلن عن إصدار ألبوم لأغاني الفيلم مجمعة بنسخة صوت أفضل.
عودة إمينيم لعالم مارفل كوميكس!
و دي مش هتكون المرة الأولى اللي يشارك فيها إيمينيم مع مارفل كوميكس، بل الظهور التالت ليه.
و ظهر إيمينيم سنة 2009 في إصدار مميز من كوميكس “The Punisher” بشخصية “Marshal Mathers”. وبعدها بـ 4 سنين في 2013 ظهر في سلسلة “Mighty Avengers” بشخصية “Slim Shady”، واللي كان موجود مع “Iron Man” قدام البيت المشهور لإمينيم على الغلاف الرسمي للعدد.
كمان حصل تعاونات ين إمينيم ومارفل قبل كده غير الكوميكس، في سنة 2015 ومع إصدار فيلم مارفل “Venom” إمينيم كان صاحب الأغنية الرسمية للفيلم اللي بتحمل نفس الاسم.
