بعد 6 شهور من إصدار ألبومه، كندريك نزل كليب لأغنية كمان من الألبوم!
كليب “Rich Spirit” هو الكليب التالت لأغاني ألبوم Mr. Morale & The Big Steppers، بعد كليبات أغاني “N95” و “We Cry Together”.
الكليب بيبدأ بكندريك بيرقص في بيت لوحده بتفاصيل بسيطة ماشية مع بساطة الأغنية نفسها. وبيتكلم في تليفون أرضي الكابل مفصول منه في لقطات غريبة، عشان يرن التليفون كمفاجأة في آخر الكليب وهو بنفس حالته.
كمان كندريك ظهر في الكليب بأزياء كتيرة كلها ملفتة للأنظار، واللي هو بنفسه شارك في تصميمها قبل الكليب.
الكليب بييجي بعد يومين من ترشيحات الجراميز.
واللي حصل فيها كندريك لامار على 8 ترشيحات! عشان يبقى صاحب تاني أكبر عدد ترشيحات في النسخة دي بعد بيونسيه.
واترشح كندريك لجوائز أحسن ألبوم، أحسن أغنية، أحسن ريكورد، أحسن ألبوم راب، أحسن أغنية راب، أحسن فيديو كليب، أحسن أداء راب، أحسن أداء راب ميلوديك. والنتائج هتكون في حفلة الـ GRAMMYs يوم 5 فبراير 2023.
