باقي يوم على حفلة مسار إجباري في الإسكندرية، اللي هتكون في أليكس أرينا – جولدن جويل. وبيجهز فريق مسار إجباري لجمهوره مفاجأت كتير منها مشاركة الرابر والبروديوسر الفايف معهم الحفلة وكمان تراك ليست طويلة وأغاني بتوزيعات مختلفة.
وبما اننا ملاحظين إن الحماس عالي قولنا نجهزكم للحفلة ونعرفكم على ٦ شخصيات هتلاقوهم في الحفلة.
١– ويكليكيس
الباند يطلع من هنا وهوب الموبايل يطلع وماينزلش الا لما الحفلة تخلص. و ده معناه إنك غالبًا مش هتشوف حاجة بسببهم، فحاول تهرب منهم. وكل ده ليه؟ علشان الخمسة ستة اللي عندهم على انستجرام او سناب شات يعيشوا معاهم اللحظة.
٢- المجاذيب
اللي حافظين كل حرف في كل اغنية اكتر من الباند نفسهم، حرفيًا. يمكن في منهم حافظ كوردات صولوهات صيام كمان، ده حتى الأغاني اللي مانزلتش ممكن يكونوا عارفينها ومش بيبطلوا تسميع الحفلة كلها.
٣- العمالقة
مهما روحت وجيت، او وقفت فين ولا حتى غيرت مكانك كام مرة، هتلاقي اطول عشرة في مصر واقفين قدامك.
٤- اللي مفكر نفسه عارف كل حاجة
هيقولك “انا مفيش اغنية مش حافظها” ولما تيجي تركز في اللي بيقوله تلاقيه بيهرتل كلام عمره ما اتقال قبل كده. حاجة كده زي فري ستايل.
٥- الرايقين
دول بقى شلة صحاب راميين هموم الدنيا و جايين ينبسطوا و بس. صوتهم اعلى من السماعات وضحكتهم واصلة لودانهم. دول عايشين أحلى لحظات حياتهم، خليك زيهم.
٦– اللي مش عاجبه
هتلاقي التكشيرة مش مفارقه وشه. ده بقى ربنا معاه، صاحبته و جايباه غصب عنه.
لو لسه محجزتش تذكرتك، فـ التذاكر متاحة بمنافذ البيع من الأسكندرية أو أونلاين من هنا.
