استعدوا لـ ريد بول “دانس يور ستايل” اللي هيخطف الأنظار في قلب النيل يوم الجمعة الجاية. دي مش مجرد مسابقة أو منافسة رقص، ده يعتبر احتفال بالفردية والتعبير عن النفس والقوة الخام للحركة.
الايفنت اتعمل لحد دلوقتي ٣ مرات واول مرة كانت في ٢٠٢١ والنسخة الرابعة هتكون يوم الجمعة في قلب نهر النيل في القاهرة بفيو مثالي انك تشوف وتتابع إبداعات الرقص، وده يعني أن اليوم هيكون مثالي لرحلة على فلوكة تنقلك لقلب الحدث, تخيل نفسك وسط النيل وبتابع عروض رقص الاستثنائية.
“ريد بول دانس يور ستايل” مش بس منصة للمنافسة، ده كمان فرصة لكل راقص يعبر عن نفسه بأسلوبه الخاص. الرقصات هتكون أنواع، من البوبينج للهيب هوب، والجمهور هو اللي هيقرر مين يكسب، يعني أنت كجمهور هيكون ليك صوت في تحديد بطل المسابقة.
اللي هيتنافس فيها ١٦ متسابق في معركة رقص غير مسبوقة واحد ضد واحد على مسرح عائم فريد من نوعه.
التفاصيل اللي مينفعش تفوتها عن الايفنت:
هيكون يوم الجمعة ١ مارس، الساعة ١ الضهر في وسط نهر النيل وهيكون في فلوكات موجودة تنقل اللي هيحضروا للمسرح العائم.
متفوتش الفرصة انك تحضر الايفنت وتستمتع بعروض الراقصين في يوم ميتنسيش في قلب النيل.