بعد ١٠ سنين على أول ساوند كلاش، ريد بُل راجعين بنسخة جديدة. السنة دي مش زي أي حفلة متعود عليها الجمهور من النسخ القديمة, وأكيد مختلفة عن الحفلات العادية لشارموفرز أو عفروتو نجوم كلاش السنة دي.
شارموفرز كانوا دائمًا حاضرين في أغلب معارك ريد بُل ساوند كلاش، ولكن السنة دي بيواجهوا تحدي جديد وصعب، في منافسة مع عفروتو، وهو واحد من أنجح الرابرو المشهد. شارموفرز بيتميزوا بالإيقاع السريع والكاريزما العالية على المسرح، ومع ذلك، برضة التحدي صعب قصاد عفروتو اللي عنده نفس الكاريزما العالية على المسرح ويتميز بأغانيه الحماسية اللي هتخلي الجمهور مش هيقف لحظة.
وعلشان فات ٤ سنين على أخر نسخة من ريد بُل ساوند كلاش، قولنا نفكركم بجولاته. الكلاش فكرته ببساطة هي جمع فرقتين أو فرقة ومغني في مواجهة بعض، بيكون فيه مسرحين منفصلين عن بعض لكل فرقة أو فنان، والجمهور اللي هو الحكم الوحيد في المواجهة دي بيكون في النص بين المسرحين.
الحفلة فيها ٦ جولات وفي كل جولة الجمهور بيسمع أغنية من كل طرف، وبعدها الحكم للجمهور، اللي الجمهور يهتف باسمه يبقى هو الكسبان
١. التسخين
قبل ما نبدأ الحفلة وعلشان الجمهور يكون مستعد للمعركة، يقدم الفنانان ٣ أغاني من أفضل أغانيهم علشان يتأكدوا إن الجمهور جاهز وبيشارك بصوت عالي. الجولة دي بس حاجة بسيطة من اللي منتظر الجمهور.
٢. الكوفر
وهنا بقى يبدأ الكلاش! هيقوم الفنانان بأداء نفس الأغنية مع إضافة نكهتهم الشخصية. بس ثانية! ايه الأغنية اللي هيغنوها؟ سألت نفسك قبل كدة ايه هتكون نسخة الراب من عفروتو لأغنية “Smooth Criminal” لمايكل جاكسون؟ أو نسخة البوب أو الأفرو من شارموفرز لأغنية “حلو وكداب” لعبد الحليم حافظ؟ تمام، ريد بُل ساوند كلاش عندهم الإجابة دي.
٣. التيك أوفر
يقوم كل فنان بأداء نسخة من أغاني التاني بطريقته الخاصة. وعلشان نسهلها، هيبدأ شارموفرز بأداء أغنية من أغانيهم وبعدين في منتصف الأغنية، يأخذ عفروتو السيطرة على الأغنية وينهيها بأسلوبه الخاص. ومين عارف، ممكن تكون النسخة المعدلة أحسن من الأصلية. هنا تبدأ ريد بُل ساوند كلاش بالتحول إلى حرب موسيقية حقيقية!
٤. الكلاش
هنا بيقوم كل طرف بأداء ثلاثة من أغانيهم الخاصة، ولكن في تويست؛ حيث لازم كل أغنية تتغنى بأسلوب يختلف تمامًا عن الصوت اللي يعتمده الفنان في العادي. الريغي يتحول إلى روك، الراب يتحول إلى بانك، والشعبي يتحول إلى كلاسيك. كل فنان بيخرج بره الكومفروت زون الخاصة به، وتوقع حدوث أي شيء لما يأدوا أكبر أغانيهم بأسلوب جديد تمامًا.
٥. الوايلد كارد
أهم لحظة في ريد بُل ساوند كلاش! هنا كل فنان بيحاول يفليكس على التاني، وبيخرجوا الورقة الرابحة ليهم، حيث بيقوم كل فنان بدعوة ضيف مفاجئ للصعود على المسرح لإبهار الجمهور. هنا بتكون الفرصة الأخيرة للفوز بتأييد الجماهير.
٦. التصويت
بمجرد أن يتم آداء أخر أغنية، بيكون القرار في إيد الجمهور، وهو اللي يقرر مين الفائز. وبس الفنان أو الفريق اللي قدر يبهر الجمهور، هيخليه يهتفله بأعلى صوته علشان يكسب.
