من الحرب في سوريا إلى الأوليمبياد!
في النسخة الـ 44 من مهرجان القاهرة السينمائي الدولي اتعرض فيلم “The Swimmers” في الشرق الأوسط للمرة الأولى. وبعدها اتعرض على منصة Netflix ومتاح دلوقتي للمشاهدة.
الفيلم بيحكي القصة البطولة الحقيقية للأختين السوريتين السباحتين يسرى و سارة مارديني، واللي اضطروا للهروب من سوريا بسبب الحرب في 2015 عبر دول كتير في ظروف صعبة جدا لحد ما قدروا يوصلوا لأوليمبياد ريو في البرازيل في 2016 ومثلت يسرى أول فريق للاجئين في البطولة ضمن 10 مشاركين. وبيسلط العمل الضوء على أزمة اللاجئين، و الأزمات اللي بيعيشها الشباب مع الحرب وخروجهم من بلادهم. وبيظهر ازاي بتخرج بطولتهم من رحم المعاناة و ازاي بطموحهم ومثابرتهم قدروا يكملوا لحلمهم.
بين أغاني الفيلم العربية والأجنبية.
الفيلم فيه مجموعة كبيرة من الأغاني، أبرزها أغنية “Titanium” لـ Sia اللي كانت الأغنية الرسمية لإعلان الفيلم.
ومخرجة الفيلم “سارة الحسيني” كانت وضحت إن اختيار أغانى مصرية جديدة في أحداث العمل كان لربط الجيل الجديد بقصة الفيلم، وقالت إنها اختارتهم لإنهم بيعبروا عن الروح الحقيقة ليسرى وسارة، تحديدا من الأغاني اللي نزلت في آخر فترة مش في 2015 وقت بداية قصتهم، ده لإنها شافت إنه هيكون رابط كويس ليهم مع الجيل الجديد دلوقتي.
