في المقالة دي هنعرفك لو مهتم بالإيقاع، أو بآلات موسيقية تانية أو حتى بالغُنا تقدر تتعلم فين وإزاي؟ حتى لو عاوز تتعلم من على الكنبة من غير ما تروح في حتة!
الإيقاع
علشان تتعلم الإيقاع على أصوله أيًا كان إيه الآلة اللي هتستخدمها، لازم تعرف مين هيعلّمك قبل ما تعرف هتتعلم فين، يعني لازم يدربك حد زي ما بيقولوا “إيده تتلف في حرير!”.. طب مين ده وألاقيه فين؟
هنقول لك.. المتصدر في لعب الإيقاع دلوقت في مصر، لو ماقولناش في الوطن العربي هو واحد اسمه هاني بدير. وهاني بدير ده يا سيدي هتلاقيه في كل الباندات تقريبًا؛ سواء مع المغنيين الكبار باختلافهم، أو مع جبال المزيكا زي عمر خيرت مثلًا.
طيب هو بيدرّب ناس؟ أكيد. هاني بيدرّب في 3 أماكن:
Art Mania في 6 أكتوبر وChaplin Studio في مصر الجديدة، و Place Des Arts في المعادي.
العود والكمان والجيتار والإيقاع يعتبر همّ أكتر حاجات بنهتم نتعلمها في المزيكا، لكن في آلات تانية، بس الناس اللي بتتعلمها قليلين زي (القانون، الناي، البزق)، ودول من أشهر الأماكن اللي بتعلمهم “بيت العود العربي”.
فاضل أهم حاجة، أجيب منين الآلة اللي هعزف عليها؟
أحسن مكان تقدر تشتري منه آلات حلوة بسعر معقول هو (شارع محمد علي)، هناك هتلاقي كل الآلات اللي هتحتاجها للتعليم باختلاف أنواعها وأحجامها.
طيب في حاجات مهمة لازم نقولها لك، أولها أنك هتوصل لمرحلة في مشوارك مع المزيكا، في المرحلة دي هتكون اكتفيت من كل المراكز ومافيش حاجة هتفيدك وتشبّعك مزيكا قد أنك تقابل بنفسك العازفين الكبار وتتعلم منهم، ودي صعبة شوية، بس الأكيد أنها مش هتكون مستحيلة بعد ما تعرف أن (فتحي سلامة) موسيقار زمانه بيعمل ورشة كبيرة جدًا كل ست شهور تقريبًا. الورشة دي تقدر تقابل فيها عازفين قدام وتشرب منها خبرات كتير، ودي لكل الآلات، يعني أيًا كانت الآلة اللي بتعزفها هتقدر تستفيد من الورشة.
طيب خلصنا من الآلات..
لو عاوز تعطي للست فيروزالناي وتغنّي! تروح لمين؟
لو حابب تغني من غير ما الجيران يشتكوا لازم الأول تتعلم المقامات الموسيقية وتعمل تدريبات صوتية وتشرب ينسون كتير، وأشهر اتنين ممكن يساعدوك في ده حاليًا في مصر هم (الشيخ زين محمود)، و(محمد ياسين المرعشلي) وده منشد سوري ومدرب ممتاز.
الشيخ زين بيدرس في شكل ورش بتتعمل كل فترة وده هيحتاج أنك تتابعه باستمرار أو تتابع الأماكن اللي بيروحها زي “بيت السناري”، أما محمد المرعشلي فهو بيدرّس بشكل دايم في أكتر من مكان، منهم مؤسسة الحلقة جنب مسجد سيدنا الحسين، وكمان في ساقية الصاوي في الزمالك .
وأنت كمبتدئ مش محتاج أكتر من المعلومات دي علشان تبدأ ومايبقى لكش حِجة، مش ناقصك غير الهِمة وشوية عناوين مهمة! ودي هنسيبها لك هنا لوقت عوزة.
Art Mania
30 منطقة الفيروز – أمام بوابة 13 مول العرب
01211605758
7 ARTS
17 ش المدينة المنورة – خلف مول العرب
0106 030 3453
Place Des Arts
25 شارع عرابي – المعادي
0101 111 1605
CHAPLIN STUDIO
5 ش عدلي كفافي – سانت فاتيما – هيليوبوليس
كلية التربية الموسيقية
27 شارعإسماعيل محمد – جزيرة الزمالك
27353750
المعهد العالي للموسيقى
حى الاهرام، شارع خاتم المرسلين خلف قاعة سيد درويش– الجيزة
دار الأوبرا المصرية
أرض الأوبرا – برج الجزيرة – الزمالك
27370602
– بيت العود العربي
شارع محمد عبده خلف جامع الأزهر بجوار حارة الست وسيلة – منزل عبد الرحمن الهراوي
25104174
وأخيرًا:
مؤسسة الحلقة
1 ش أم الغلام – الحسين – القاهرة
